Աստանայում Եվրասիական միջկառավարական խորհրդի նիստն է տեղի ունենում։ Նիստը սկսվել է նեղ կազմով՝ պատվիրակությունների ղեկավարների մասնակցությամբ՝ ԵՏՄ անդամ երկրների կառավարությունների ղեկավարների, որոնց հետո միացել են նաեւ պատվիրակությունների անդամները, փոխանցում է «ՏԱՍՍ»-ը։
Ղազախստանի վարչապետ Բաքիթժան Սագինտաեւը ողջունել է նիստի մասնակիցներին եւ շնորհակալություն հայտնել «ԷՔՍՊՕ-2017»-ին երկրների ակտիվ մասնակցության համար, որը տեղի է ունենում Աստանայում։
«Այսօր մենք պետք է մի շարք կարեւոր հարցեր քննարկենք՝ թվային օրակարգի, ապրանքներին հետեւելու մեխանիզմի վերաբերյալ համաձայնագրի, կենսաթոշակային ապահովման պայմանագրի, ժամանակավոր համաձայնագիր կնքելու բանակցությունների մասին հանձնաժողովի զեկույցի, ԵՏՄ-ի եւ Իրանի միջեւ ազատ առեւտրի գոտու ձեւավորման, ինչպես նաեւ որոշ այլ հարցերի վերաբերյալ», -ասել է Սագնիտաեւը։
Օրակարգում կքննարկվեն նաեւ ԵՏՄ-ի գործառույթների եւ զարգացման վերաբերյալ մի շարք հարցեր։ «Հիմնականում ուշադրություն կդարձնենք ինտեգրման ոլորտային ուղղություններին»,-ավելի վաղ ասել է ՌԴ-ի կառավարության աշխատակազմի աշխատակիցը։
Նրա խոսքով՝ նիստի արդյունքում ծրագրվում է մի քանի որոշում կայացնել՝ կապված համակարգված տրանսպորտային քաղաքականության իրագործման, ինչպես նաեւ միության տարածքում ապրանքներին հետեւելու շուրջ։
Բացի այդ՝ ԵՏՄ-ի կառավարությունների ղեկավարները կքննարկեն միության ներքին շուկայում սահմանափակումները վերացնելու հարցերը։ «Մասնավորապես միջկառավարական խորհրդի անդամները կքննարկեն միության անդամ երկրներում աշխատողների կենսաթոշակային ապահովման պայմանագրի նախագծի շուրջ միջանկյալ աշխատանքները եւ ազգային վարորդական իրավունքները փոխադարձ ընդունելու հարցը»,-ասել է ՌԴ-ի կառավարության աշխատակազմի աշխատակիցը։
Նրա խոսքով՝ կքննակվեն նաեւ ԵվրԱզԷՍ-ի միջազգային օրակարգում արդիական թեմաներ, «ներառյալ՝ ժամանակավոր համաձայնագրի նախապատրաստությունը, Իրանի եւ ԵՏՄ-ի միջեւ ազատ առեւտրի գոտու ձեւավորումը»։
