Մեկ տարի առաջ կալանավորված Սարի թաղի 10 բնակիչների գործով դատական նիստերն անընդհատ հետաձգվում են՝ «Սասնա ծռեր» խմբի գործով նիստերի պատճառով: NEWS.am-ի հետ զրույցում կալանավորվածներից Էդուարդ Զեյթունյանի կինը՝ Լալա Բերնեցյանը նշեց, որ անգամ իրենց հարազատների հետ տեսակցությունները թույլ չեն տալիս, երբ այդ օրը «Սասնա ծռերի» անդամների հարազատները տեսակցում են իրենց հարազատների հետ:
«Գնում ենք տեսակցության, բայց «Սասնա ծռերի» ընտանիքի անդամներից մարդ է լինում, չենք կարողանում մտնել այնտեղ: Պատկերացնում եմ, եթե «Սասնա ծռեր» անդամների բոլորի տեսակցությունները բաց լինեին՝ նշանակում է տարիներով պետք է մեր հարազատներին չտեսնեինք: Ես առաջարկում եմ կոնկրետ օրեր նշանակել տեսակցությունների համար, որպեսզի այսպիսի իրավիճակ չստեղծվի»,-ասաց նա:
Նրա խոսքով, կալանքի տակ գտնվող իր ամուսինն ու Հարություն Թորոսյանը առողջական լուրջ խնդիրներ ունեն եւ այդ վիճակում չեն կարող մնալ անազատության մեջ:
Հիշեցնենք, որ 2016 թվականի հուլիսին Սարի թաղում ոստիկանության հետ բախումների ընթացքում 10 մարդ է ձերբակալվել: