Բելգիայում մեքենայի վարորդը միտումնավոր վրաերթի է ենթարկել երեկույթի մասնակիցներին, որոնցից չորսը վիրավորում է ստացել, մեկը ծանր վիճակում է, հայտնում է Belga գործակալությունը։

Դեպքը տեղի է ունեցել շաբաթ լույս կիրակի գիշերը, տեղական ժամանակով ժամը երեքն անց կեսին, Բելգիայի Լյուքսեմբուրգ նահանգի Ասենուա քաղաքում։

Մեքենայի վարորդը, որտեղ եւս երկու մարդ կար, միտումնավոր է վրաերթի ենթարկել մարդկանց, հայտնել է գործակալությունը՝ վկայակոչելով դատախազության ներկայացուցչին։

Քանի որ հանցագործության ականատեսներն այդ մասին օպերատիվ հայտնել են ոստիկանություն, վրաերթ իրականացրած անձիք մոտ մեկ ժամ հետո ձերբակալվել են իրավապահների կողմից։

Դատախազի ներկայացուցչի հայտարարության համաձայն՝ միջադեպն ահաբեկչություն չի որակվում։