ՄԻԵԴ-ը «Հիմնադիր խորհրդարանի» անդամ, «Սասնա ծռերի» գործով մոտ մեկ տարի կալանքի տակ գտնվող Կարո Եղնուկյանի գործով միջնորդությանը հատուկ կարգավիճակ է տվել եւ այն շուտով կքննվի: Այս մասին այսօր՝ օգոստոսի 21-ին, լրագրողների հետ հանդիպմանն ասաց նրա շահերի պաշտպան Տիգրան Հայրապետյանը: Նա նշեց, որ իր պաշտպանյալին ապօրինի կալանքի տակ պահելու մասով ՄԻԵԴ միջնորդություն էր ներկայացվել, որը մինչեւ տարեվերջ կքննվի:
«Կարո Եղնուկյանը քաղբանտարկյալ է, մինչեւ հիմա պարզ չեն նրան առաջադրված մեղադրանքի հիմքերը: Նշանակում է, որ վեց տարի մնալու է կալանքի տակ եւ մասնակցելու է դատական նստերի, որոնց հետ կապ չունի ինքը: ՄԻԵԴ էինք դիմել եւ միջնորդել, որպեսզի հնարավորինս շուտ քննվի կալանքի հարցը: Պատասխան էինք ստացել, որ գործին հատուկ կարգավիճակ է տրվել եւ հնարավորինս շուտ կքննեն: Հույս ունենք, որ մինչեւ տարվա վերջ կքննվի»,-ասաց պաշտպանը :
Կարո Եղնուկյանը մեղադրվում է Քրեական օրենսգրքի 218 եւ 219 հոդվածներով՝ պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու համար: