Ռուսաստանում բացվում է Հյուսիսային Կորեայում ճամփորդելու համար առաջին տուրիստական գործակալությունը, որը հավաստագիր է ստացել Փհենյանում: Այս մասին հայտնել է Տուրիստական գործակալությունների միության նախագահ Սերգեյ Գոլովը, փոխանցում է «Ինտերֆաքսը»:
«Հույս ունեմ, որ NKOREAN ընկերությունը բեկում կմտցնի: Սա շատ կարեւոր է մեր տուրիստների համար, վերջնական սպառողի համար, մեծ հետաքրքրվածություն կա: Կարծում եմ, որ լավ հեռանկարներ են տեսանելի: Մենք մեր հերթին այս ընկերությանը տեղեկատվությամբ կաջակցենք»,- ասել է Գոլովը՝ ռուսական շուկա NKOREAN-ի մտնելուն նվիրված մամուլի ասուլիսում:
Ընկերությունը, որը մասնագիտացած է Հյուսիսային Կորեա ճանապարհորդություններ կազմակերպելու ոլորտում, կաշխատի ՌԴ-ում Հյուսիսային Կորեայի դեսպանատան աջակցությամբ:
Իր հերթին ՌԴ-ում Հյուսիսային Կորեայի դեսպանատան խորհրդական Կիմ Սեն Հունը հայտարարել է, որ իր երկիրը երաշխավորում է օրինապահ տուրիստների անվտանգությունը, ինչին է նպաստում նաեւ Հյուսիսային Կորեայի միջուկային սպառազինությունը:
Նա նաեւ հայտնել է, որ Հյուսիսային Կորեան մտադիր է ՌԴ հետ տուրիստական կապերն ակտիվորեն զարգացնել: Մասնավորապես՝ կպարզեցվի ռուսաստանցիներին վիզաների տրամադրման ընթացակարգը, իսկ սպասելու ժամկետը կկրճատվի 2-3 շաբաթից մինչեւ 3-5 օր:
