Ներկայումս քննարկվում է Հրազդանի մասնավոր գազանանոցում օրերս իր խնամողի վրա հարձակված առյուծին քնեցնելու եղանակով սատկացնելու հարցը:

Պարզվել է, որ առյուծը Հրազդանի մասնավոր գազանանոց է տեղափոխվել Երեւանի կենդանաբանական այգուց՝ պայմանագրային հիմունքներով եւ այն գազանանոցում պետք է մնար մինչեւ 2011թ. ապրիլի 13-ը: Երեւանի կենդանաբանական այգու տնօրեն Սահակ Աբովյանը տեղեկացրել է, որ կողմ է կենդանուն սատկացնելուն՝ քնեցման միջոցով: Նույն կարծիքին է նաեւ Հրազդանի մասնավոր գազանանոցի տնօրեն Արմեն Ավետիսյանը, իսկ Երեւանի կենդանաբանական այգու գիշատիչների բաժնի ղեկավար Յունոնա Խանզադյանը պնդում է, որ կենդանին մեղավոր չէ, եւ աշխարհում քնեցման պրակտիկա գոյություն չունի: «Նման ձեւով վարվում են կրկեսի գիշատիչների հետ», ասել է նա:

Ինչպես NEWS.am-ին հայտնել էր ֆոտոլրագրող Գագիկ Շամշյանը, նոյեմբերի 28-ին ժամը 17-ի սահմաններում Հրազդանի մասնավոր գազանանոցում պահվող առյուծը հարձակվել էր միկրոթաղամասի բնակիչ, 21-ամյա Նվեր Էդիկի Սարգսյանի վրա եւ ամբողջովին քրքրել նրա ոտքը: Տուժածին շտապ տեղափոխել էին հիվանդանոց, սակայն նա արնաքամ էր եղել ու մահացել:

Գազանանոցը գտնվում է Կոտայքի մարզի ընդհանուր իրավասության դատարանի Հրազդանի նստավայրի եւ Հրազդանի բժշկական կենտրոնի հարեւանությամբ: Այն պատկանում է  Հրազդան քաղաքի միկրոթաղամասի 263 շենքի 6-րդ բնակարանի բնակիչ Արմեն Միհրանի Ավետիսյանին:

Դեպքի առթիվ ոստիկանության քննչական գլխավոր վարչության Հրազդանի քննչական բաժնում նյութեր են նախապատրաստվել:

Լուսանկարները եւ տեսանյութը՝ Գագիկ Շամշյանի