![](img/news/04/06/91/default.jpg)
Թուրքական կառավարությունն ուզում է կարգավորել հարաբերություններն Իսրայելի հետ: Այդ մասին դեկտեմբերի 6-ին հայտարարել է Թուրքիայի փոխվարչապետ Ջեմիլ Չիչեկը:
«Թուրքիան երբեք չի մերժի նրան, ով ուզում է ընկերաբար կարգավորել հարաբերությունները: Մենք ձգտում ենք խաղաղության եւ հարաբերությունների կարգավորման», - Անկարայում կայացած նախարարների խորհրդի նիստի արդյունքում ասել է Չիչեկը, հաղորդում է Anadolu գործակալությունը:
Չիչեկի հայտարարությանը նախորդել է Իսրայելի անտառային հրդեհների դեմ պայքարում Թուրքիայի երկու ինքնաթիռների ներգրավվումը:
Օգնության համար Իսրայելի վարչապետ Բենիամին Նեթանիահուն հեռախոսազրույցում շնորհակալություն է հայտնել Թուրքիայի վարչապետին:
Չիչեկը հայտարարել է, որ Թուրքիան Իսրայելի դեմ ոչինչ չունի, սակայն Անկարան դեմ է Իսրայելի սխալ քաղաքականությանը: