Հյուսիսային Կորեայի դատարանը մահապատժի է դատապարտել 2 հարավկորեացի լրագրողների եւ հրատարակչի «երկրի արժանապատվությունը վիրավորելու» համար՝ պայմանավորված Հյուսիսային Կորեայի մասին գրքի գրախոսությամբ եւ դրա հեղինակի հետ հարցազրույցով:
Reuters-ը հայտնում է, որ «Հյուսիսային Կորեա. Գաղտնաբար» գիրքը Սեուլում գրել է Reuters-ի թղթակից Ջեյմս Փիրսոնը եւ Economist-ի նախկին լրագրող Դենիել Թյուդորը: Գիրքը հիմնված է հյուսիսկորեացի փախստականների, դիվանագետների եւ ձեռնարկատերերի հետ հարցազրույցների վրա, եւ պատմում է, թե Հյուսիսի բնակիչներն ինչպես են հասանելիություն ստանում Հարավի երաժշտությանը, սերիալներին եւ նորաձեւությանը, ինչպես նաեւ դիտում են մաքսանենգ չինական եւ ամերիկյան ֆիլմեր: Կորեերեն թարգմանությամբ գիրքը հրատարակվել է այս ամիս ավելի վաղ: Գրքի գրախոսությունը գրել են տեղացի լրագրողներ Սոն Յո Ռիմը եւ Յանգ Չի Հոն:
Փհենյանի կարծիքով՝ գիրքը «Հյուսիսային Կորեայի իրականության չարամիտ զրպարտանք է», իսկ գրախոսությունը գրած լրագրողները «զազրելի հանցագործություն են կատարել, ծանր վիրավորանք հասցնելով Հյուսիսային Կորեայի արժանապատվությանը»: Կենտրոնական դատարանը 2 լրագրողներին եւ հրատարակչին մահապատժի է դատապարտել: Այն նաեւ Հարավային Կորեայի կառավարությունից պահանջել է հետաքննել «հանցագործությունները» եւ նրանց պատժել:
