ԿԺԴՀ-ի միջուկային փորձարկումը «խորը մտահոգություն» է առաջացնում։ Այս մասին հայտնել է ՄԱԳԱՏԷ-ի գլխավոր տնօրեն Յուկիա Ամանոն, ելույթ ունենալով ՄԱԳԱՏԷ-ի կառավարիչների խորհրդի նիստին, փոխանցում է ՄԱԿ-ի ռադիոն։

Նա հիշեցրել է, որ սա թվով վեցերորդ ու ամենազանգվածային միջուկային փորձարկումն է, որն իրականացրել է ԿԺԴՀ-ն՝ 2006-ից սկսած։ Նրա խոսքով՝ ՄԱԳԱՏԷ-ի փորձագետները ֆիքսում են ակտիվություն Յոնբյոնի գիտահետազոտական միջուկային կենտրոնում, ինչը վկայում է աշխատանքների շարունակման մասին։

Ամանոն կոչ է արել ԿԺԴՀ-ին խստորեն հետեւել ԱԽ համապատասխան բանաձեւերի պահանջներին ու անհապաղ վերականգնել ՄԱԳԱՏԷ-ի հետ համագործակցությունը՝ առկա խնդիրների լուծման համար։

Հիշեցնենք, որ Գործակալության փորձագետները 2009-ից սկսած ուղիղ մուտք չունեն Հյուսիսային Կորեայի միջուկային ձեռնարկություններ։ Գլխավոր տնօրենը նշել է, որ ՄԱԳԱՏԷ-ն ստեղծել է նոր թիմ՝ Հյուսիսային Կորեայում իրավիճակին ավելի մանրակրկիտ հետեւելու ու փորձագետների հնարավոր վերադարձն այդ երկիր ապահովելու համար։