Ահաբեկիչները մտադրվել էին Բաքու ուղեւորվող լաստանավ պայթեցնել: Այս մասին հայտնում է haqqin.az-ը՝ վկայակոչելով «Թուքմենստանի խրոնիկա»-ին:
Թուրքմենական պարբերականն, իր հերթին վկայակոչելով սեփական աղբյուրներին, տեղեկացրել է, որ օգոստոսի 28-ին Թուրքմենբաշի քաղաքի նավահանգստում ահաբեկչությունը կանխել են Թուրքմենստանի հատուկ ծառայությունները: Թուրքմենստանի քաղաքացի 2 եղբայրները (անուն-ազգանունը չի հրապարակվում) փորձել են պայթուցիկ տանել բեռնաուղեւորատար «Բահթիյար» լաստանավ, որը երթեւեկում է Թուրքմենբաշիի եւ Բաքվի միջեւ:
Եղբայրները տարբեր տեղերի համար էին տոմս գնել եւ մտադիր էին պայթուցիկը լաստանավ տանել առանձին-առանձին ու այնտեղ ռումբը պատրաստել: Պայթյունը պետք է կատարվեր Թուրքմենստանի ջրային տարածքում, նշել է պարբերականը:
Այդ օրը լաստանավով պետք է ուղեւորվեր 170 մարդ եւ տասնյակ ավտոմեքենաներ՝ ներառյալ թուրքական ընկերությունների բեռնատարներ իրենց անձնակազմով: Պարբերականի աղբյուրները կարծում են, որ հատուկ ծառայությունները ահաբեկչության մասին նախապես են տեղյակ եղել: