ՀՀ հատուկ քննչական ծառայությունում քրեական գործ է հարուցվել ՀՀ քննչական կոմիտեի Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնի քննիչի կողմից ապացույց կեղծելու դեպքի առթիվ:
ՀՔԾ-ից NEWS.am-ին հայտնում են, որ Երեւան քաղաքի Աջափնյակ եւ Դավթաշեն վարչական շրջանների ընդհանուր իրավասության դատարանում ծանր հանցագործության վերաբերյալ քննվող քրեական գործով վկա Ջ. Հ.-ն 22.08.2017թ.-ին կայացած դատական նիստի ժամանակ տվել է նախաքննական ցուցմունքին էապես հակասող ցուցմունք: Այնուհետեւ Ջ. Հ.-ն, նախազգուշացվելով սուտ մատնություն կատարելու համար նախատեսված քրեական պատասխանատվության մասին, դատարանում նույնաբովանդակ հաղորդում է տվել, որ իր նախաքննական ցուցմունքի վերաբերյալ կազմված արձանագրությունը կեղծ է, քանի որ նախաքննության ընթացքում երբեւէ չի հարցաքննվել քրեական գործով վարույթն իրականացնող` Աջափնյակ եւ Դավթաշեն վարչական շրջանների քննչական բաժնի քննիչի կողմից, իսկ իր` որպես վկայի հարցաքննության արձանագրությունում ինքը չի ստորագրել:
Այսպիսով, ՀՀ քննչական կոմիտեի Աջափնյակ եւ Դավթաշեն վարչական շրջանների քննչական բաժնի պետական հատուկ ծառայություն իրականացնող պաշտոնատար անձի կողմից ծանր հանցագործության վերաբերյալ քրեական գործով ապացույց կեղծելու փաստի առթիվ հարուցվել է քրեական գործ` ՀՀ քրեական օրենսգրքի 349-րդ հոդվածի 3-րդ մասի մասի 1-ին կետով:
Կատարվում է նախաքննություն:
