Եվրամիությունն ավելի քան 50 մլն եվրո է ներդրել Հայաստանի արդարադատության ոլորտում: Այս մասին սեպտեմբերի 14-ին հայտարարել է Հայաստանում ԵՄ պատվիրակության ղեկավար, դեսպան Պյոտր Սվիտալսկին՝ ելույթ ունենալով «Հայաստանի մարզերի Եվրոպական ակումբների» միջեւ էսսեների մրցույթի հաղթողներին մրցանակների հանձնման արարողության ժամանակ:
«Մենք պատրաստ ենք շարունակել համագործակցությունը Հայաստանի հետ: Եվրամիությունը զգալի օգնություն է ցուցաբերել ընտրական գործընթացում, և մենք հավատում ենք, որ դա եղել է ճիշտ ներդրում: Մենք լավ քննարկումներ ենք անցկացրել մարդու իրավունքների վերաբերյալ հարցերի շուրջ: «Արևելյան համագործակցության» երկրներից հենց Հայաստանի հետ է մարդու իրավունքների վերաբերյալ ամենակառուցողական երկխոսությունը, և հենց մարդու իրավունքների բնագավառում մենք շատ օգտակար գործունեություն ենք իրականացրել»,- նկատել է Սվիտալսկին:
Եվրամությունը, ընդգծել է նա, պատրաստ է շարունակել այդ ամենը: «Մենք հասկանում ենք, դա գործընթաց է, որը երբեմն ժամանակ է պահանջում: Երբեմն մենք, իհարկե, քննադատաբար ենք մոտենում. դուք ճանաչում եք ինձ: Եվ քանի որ մենք համագործակցում ենք զգայուն բնագավառներում, ես շատ ուրախ եմ, որ շատ հայեր ընկալում են իմ քննադատությունը որպես բարեկամական ձայն դրսից: Մենք չենք ուզում պարտադրել ոչինչ. միայն ուզում ենք, որ Հայաստանը հետևի որոշակի ստուգված եվրոպական շաբլոնների: Դուք գիտեք, թե որքան դժվար է փոխել որևէ մեկի մտածելակերպը, ուստի մենք այս ամենը ընկալում ենք որպես գործընթաց»,- ավելացրեց Հայաստանում Եվրամիության պատվիրակության ղեկավարը: