2030 թվականի սկզբին Mazda ընկերությունը ծրագրել է հրաժարվել դիզելային եւ բենզինային շարժիչներով ավտոմեքենաների արտադրությունից՝ ամբողջությամբ անցնելով էլեկտրամոբիլներին եւ հիբրիդներին: Այս մասին հայտնում է Kyodo գործակալությունը:
Ճապոնական կոնցեռնի ղեկավարները որոշել են ժամանակակից միտումներին համընթաց քայլել: Վերջին տարիներին ամբողջ աշխարհում վառելիքի ծախսի նկատմամբ ավելի խիստ էկոլոգիական նորմաներ եւ պահանջներ են սահմանվում: Իհարկե, չպետք է մոռանալ նաեւ շահույթի մասին: Նման լուրջ քայլ կատարելով՝ ընկերությունը հույս ունի իր դիրքերն ամրապնդել եվրոպական շուկայում, որտեղ էկոլոգիական միտումներին ավելի խիստ են հետեւում: Օրինակ՝ 2040 թվականին Ֆրանսիան եւ Մեծ Բրիտանիան ծրագրում են հրաժարվել սովորական ավտոմեքենաների վաճառքից:
Մինչ այս ընկերությունը խաղադրույք էր կատարում խնայող դիզելային եւ բենզինային շարժիչներով ավտոմեքենաների արտադրության վրա: Սակայն Mazda-ի հավաքածուում տեղ է գտնվել նաեւ Axela հեչբեքի հիբրիդային մոդիֆիկացիայի համար:
Օգոստոսին ճապոնական կոնցեռնը հայտարարել էր Toyota-ի հետ գործընկերություն հաստատելու մասին: Ընկերությունները պատրաստվում էին միասին մշակել էլեկտրաշարժիչներով մոդելներ եւ ԱՄՆ-ում համատեղ արտադրություն հիմնել: