Մոտ ապագայում՝ հնարավոր է, մեկ կամ երկու տարուց, տնտեսական և ժողովրդագրական բարդ իրավիճակի պատճառով Հայաստանը հայտնվի դեֆոլտի եզրին: Սեպտեմբերի 15-ին՝ լրագրողների հետ հանդիպման ժամանակ, նման կարծիք է հայտնել «Մոդուս Վիվենդի» կենտրոնի տնօրեն փորձագետ Արա Պապյանը:
Նրա խոսքով՝ Հայաստանի արտաքին պարտքն արդեն գերազանցել է ՀՆԱ 50 տոկոսը և կազմում է 6,5 մլրդ դոլար: Վճարումների գագաթնակետը կհասնի 2019-2020 թվականներին: «Եվ մենք կամաց-կամաց դրան ենք մոտենում: Մի կողմից մենք չունենք ՀՆԱ աճ, իսկ մյուս կողմից մենք արտաքին պարտքի մարման համար ծախսում ենք ավելի շատ միջոցներ, քան կրթության և առողջապահության վրա միասին վերցրած»,-նշում է Պապյանը:
Սակայն փորձագետը կարծում է, որ սխալ կլինի այդ ամենի համար մեղադրել միայն կառավարությանը, քանի որ իր բացասական ազդեցությունն ունեցել է նաև նախկին ղեկավարությունը: