Նոր մանրամասներ են հայտնի դարձել սեպտեմբերի 14-ին Հրազդանի Միկրոշրջան թաղամասի 94-րդ շենքի 5-րդ հարկից ցած ընկած կնոջ դեպքից: Ականատեսները NEWS.am-ի թղթակցին պատմեցին, որ ամեն բան մի ակնթարթում է տեղի ունեցել.
«Այդ նույն շենքի առաջին հարկում փոստային բաժանմունք կա, էդտեղ էինք, մեկ էլ ուժեղ դրմփոց լսվեց, ոնց որ տանիքը պոկվեր: Արագ դուրս եկանք, տեսանք Մ-ն երեսի վրա ընկած է գետնին: Չենք կպել, անմիջապես զանգահարել ենք շտապ օգնություն: Երկու րոպե անց արդեն շնչում էր: Էլ ոչինչ չգիտենք: Ինքնասպանության մասին խոսք լինել չի կարող, որովհետեւ շատ իդեալական ընտանիք են՝ բանիմաց, կրթված, ամուսիններով էլ շատ համերաշխ»,-պատմեցին շենքի բնակիչները:
Նրանց խոսքով, Մ.-ն ամուսնու եւ երկու երեխաների հետ ապրում էր հայրական տանը՝ իր ծնողների հետ միասին: Մայրը ուսուցչուհի է, ամուսինը եւս աշխատում է, երկու երեխա ունեն:
«Երեւի լվացք փռելիս է եղել, կամ մի բան է ուզել վերցնել, ընկել է, դժբախտ դեպք է եղել, չէր կարող ինքնասպանություն լինել: Պապիկն է երեխաներին դպրոց տանում-բերում, ինքը տանը մենակ է եղել այդ պահին: Հիմա ամեն պահ աղոթում ենք, որ փրկվի մեր աղջիկը»,-ասացին հարեւանները:
Դեպքից անմիջապես հետո Մ.-ն տեղափոխել են Երեւանի «Էրեբունի» ԲԿ: Նա դեռեւս գնտվում է վերակենդանացման բաժանմունքում՝ անգիտակից վիճակում:
Ավելի վաղ NEWS.am-ը հայտնել էր, որ սեպտեմբերի 14-ին արտակարգ դեպք է տեղի ունեցել Հրազդան քաղաքում:Դեռեւս չպարզված հանգամանքներում Հրազդանի Միկրոշրջան թաղամասի բնակչուհին (մոտ 30 տարեկան), ընկել է 94-րդ շենքի 5-րդ հարկից:
Դեռեւս պարզ չի արդյոք տեղի ունեցածն ինքնասպանության փորձ է, թե դժբախտ պատահար: