Սահմանին այս պահին համեմատաբար նորմալ է: Այս մասին այսօր՝ սեպտեմբերի 18-ին, լրագրողների հետ զրույցում ասաց Արցախի թեմի առաջնորդ Պարգեւ արքեպիսկոպոս Մարտիրոսյանն, ով մասնակցում է Հայաստան-Սփյուռք համաժողովին։ Պարգեւ Սրբազանը նշեց նաեւ, որ Թալիշում նույնպես ամեն ինչ վերահսկվում է եւ վերականգնման աշխատանքները շարունակվում են:
Նրա խոսքով, Սփյուռքը կարող է մեծ դերակատարում ունենալ արցախյան խնդրի կարգավորման հարցում։
«Սփյուռքը կարող է մեծ դերակատարում ունենալ, հայ համայնքները կարող են շատ ակտիվ աշխատել համանախագահող երկրներում՝ Ֆրանսիայում, Ռուսաստանում եւ Ամերիկայի Միացյալ Նահանգներում։ Իրենց ներդրումներով կարող են զորացնել Մայր Հայաստանը եւ Արցախը», - ասաց Պարգեւ սրբազանը։
Հարցին, թե գուցե ադրբեջանական լոբբին ավելի ակտիվ է աշխատում, Պարգեւ սրբազանն պատասխանեց. «Ադրբեջանն ազնիվ ճանապարհով չի գնում, շատ հաճախ մեծածավալ կաշառքներով է զբաղվում, դա ազնիվ ձեւ չէ»։