Շատ սիրիահայեր, որոնք պատերազմի ընթացքում տեղափոխվել էին այլ երկրներ, կամաց-կամաց վերադառնում են Սիրիա: Այս մասին այսօր՝ սեպտեմբերի 18-ին, լրագրողների հետ զրույցում ասաց Սիրիայի խորհրդարանի հայ պատգամավոր Ժիրայր Ռեիսյանը:
Հայ պատգամավորի խոսքով, պատերազմի ծանր տարիներից հետո Սիրիան վերականգնվում է:
«Սիրիահայերը պատերազմի տարիներին տեղափոխվել էին տարբեր երկրներ, ես սա գաղթ չեմ համարում, այլ տեղափոխություն՝ անվտանգությունից ելնելով: Մարդիկ ոչ միայն երկրից են դուրս եկել, այլեւ վտանգի մեջ գտնվող քաղաքներից առավել անվտանգ վայրեր էին տեղափոխվել: Այժմ տեղեկություններ ունեմ, որ շատ սիրիահայեր են վերադարձել Հալեպ, այդ թվում, եվրոպական երկրներից, Հայաստանից, անգամ Ավստրիալայից ընտանիքներ կան, որոնք վերադարձել են: Իհարկե, խնդիրներ կան, սակայն պայմանները բարելավվում են»,- ասաց Ժիրայր Ռեիսյանը:
Հայ պատգամավորը հույս ունի, որ առաջիկայում վերադարձողներն ավելի շատ կլինեն, քանի որ երկիրը կայունանում է: Ժիրայր Ռեիսյանը հայտնեց նաեւ, որ Հալեպում ներկայումս բնակվում է մոտ 18 հազար հայ, իսկ ամբողջ երկրում հայերի թիվը հասնում է շուրջ 28 հազարի:
