Լիբանանում վերջին տարիներին լուրջ ցնցումներ չկան, իհարկե, անկայուն վիճակ է, բայց հայ համայնքին դա շատ չի վնասել: NEWS.am-ի հետ զրույցում ասաց Լիբանանի Հայկազյան համալսարանի նախագահ Փոլ Հայդոսթյանը:
«Հայկական միությունների, քաղաքական կենտրոնների կողքին Լիբանանում գործում են նաեւ եկեղեցական կենտրոններ, ինչը նշանակում է հայ համայնքն ամբողջացած է այստեղ: Բացի դրանից, պետության զանազան գրասենյակներում բարձրաստիճան հայեր կան՝ 6 պատգամավոր, 2 նախարար: Օրենքով հաստատված իրականություն է, որ հայն իր ներկայությունը պետք է ունենա Լիբանանում, եւ հայի համար սա շատ կարեւոր է սա»,- ասաց նա:
Անդրադառնալով Հայկազյան համալսարանի գործունեությանը՝ Փոլ Հայդոսթյանը նշեց, որ հիմնադրման առաջին օրերից նպատակ կար պատրաստել հայ ղեկավար եւ հայ ուսուցիչ, այսօր, սակայն, այստեղ սովորում են նաեւ այլազգիներ:
«Համալսարանը չունի խտրականություն. Ցանկացած անձ կարող է այստեղ սովորել»,- ասաց նա: