Ավելի քան 50 երկիր, այդ թվում՝ Բրազիլիան եւ Հարավային Աֆրիկան, ստորագրել են Միջուկային զենքի արգելման մասին պայմանագիրը։ Հանդիսավոր արարողությունն ընթանում է Նյու Յորքում ՄԱԿ կենտրոնական գրասենյակում, փոխանցում է ՏԱՍՍ–ը։
Առաջինն այն ստորագրել է Բրազիլիայի նախագահ Միշել Թեմերը։ Արարողությանը մասնակցել են մի քանի պետությունների ղեկավարներ, տասնյակ արտգործնախարարներ։ Օրվա ընթացքում վավերացված հավատարմագրեր կփոխանցեն 3 երկիր՝ Գայանան, Վատիկանն ու Թաիլանդը։
Միջուկային զենքի արգելման մասին պայմանագիրը ուժի մեջ կմտնի 50 երկրների կողմից ստորագրվելուց եւ վավերացվելուց հետո 90 օրվա ընթացքում։ Փաստաթղթում ասվում է, որ մասնակիցները պարտավորվում են երբեք ոչ մի դեպքում չմշակել եւ չկուտակել միջուկային զենք, ինչպես նաեւ չկիրառել կամ չսպառնալ կիրառել այն։