Իրաքի, Իրանի եւ Թուրքիայի արտգործնախարարներ Իբրահիմ ալ Ջաֆարին, Ջավադ Զարիֆն ու Մեվլութ Չավուշօղլուն Նյու Յորքում ՄԱԿ Գլխավոր ասամբլեայի 72-րդ նստաշրջանի շրջանակում հայտարարություն են արել՝ կոչ անելով Իրաքի Քուրդիստանի իշխանություններին հրաժարվել անկախության հանրաքվեից։
«Նախարարները վճռականապես կողմ են Իրաքի տարածքային ամբողջականության պահպանմանը եւ մտահոգված են, որ հանրաքվեն մեծ ռիսկի տակ է դնում ԻՊ–ի դեմ պայքարում Իրաքի նվաճումները։ Հանրաքվեն ապակառուցողական է եւ կարող է տարածաշրջանում նոր հակամարտությունների պատճառ դառնալ։ Կողմերը որոշել են դիմել Իրաքի քրդական ղեկավարությանը՝ կոչ անելով ձեռնպահ մնալ հանրաքվե անցկացնելուց եւ համաձայնել են այդ կապակցությամբ քննարկել համակարգված պատասխան գործողությունների ընդունման մասին հարցը»,– ասված է հայտարարության մեջ, փոխանցում է «ՌԻԱ Նովոստի»–ն։
Կողմերը նշել են, որ Իրաքի սահմանադրության շրջանակում կառուցողական երկխոսությունը Բաղդադի եւ Էրբիլի միջեւ խնդիրների լուծման միակ ուղին է։