ԱՄՆ Ֆիննախն իրավունք կստանա պատժամիջոցներ սահմանել օտարերկրյա բանկերի դեմ, որոնք Հյուսիսային Կորեայի հետ առեւտրի հետ կապված գործարքներ են իրականացնում։ Այս մասին հայտնել է ԱՄՆ նախագահ Դոնալդ Թրամփը՝ ստորագրելով հրաման Հյուսիսային Կորեայի հետ առեւտուր անող անձանց ու ընկերությունների դեմ պատժամիջոցներ սահմանելու մասին, փոխանցում է Reuters-ը։
Նա նշել է, որ նոր հրամանագիրը զգալիորեն կընդլայնի լիազորությունները այն ընկերությունների ու ֆինանսական հաստատությունների նկատմամբ, որոնք ֆինանսավորում կամ հեշտացնում են Հյուսիսային Կորեայի հետ առեւտուրը։ Նրա խոսքով՝ նոր հրամանը թույլ կտա կրճատել եկամուտների աղբյուրները, որոնք Փհենյանին օգնում են զարգացնել «ամենամահաբեր զենքը, որը հայտնի է մարդկությանը»։ Թրամփը հայտնել է, որ նոր պատժամիջոցների թիրախը կարող է դառնալ Հյուսիսային Կորեայի տեքստիլարդյունաբերությունը, ձկնորսությունը, տեղեկատվական տեխնլոլոգիաները ու մշակող արդյունաբերությունը։
