Իրաքյան Քուրդիստանի անկախության հանրաքվեն Թուրքիայի ազգային անվտանգության հարց է: Անկարան երբեք չի ընդունի Իրաքում կամ Սիրիայում կարգավիճակի փոփոխությունը: Այս մասին հայտարարել է Թուրքիայի վարչապետ Բինալի Յըլդըրըմը, փոխանցում է Reuters-ը:
«Թուրքիայի համար անընդունելի են այն գործողությունները, որոնք Սիրիայում եւ Իրաքում իրավիճակի փոփոխություն են առաջացնում: Եվ մենք անհրաժեշտ գործողություններ կձեռնարկենք»,- ասել է նա:
Ավելի վաղ Թուրքիայի նախագահ Ռեջեփ Էրդողանը հայտարարել էր Իրաքյան Քուրդիստանի դեմ պատժամիջոցներ սահմանելու հնարավորության մասին: Թուրքիայի կառավարությունը եւ Անվտանգության խորհուրդը սեպտեմբերի 22-ին նիստ կանցկացնեն՝ քննարկելու այն քայլերը, որոնք կձեռնարկվեն այս հանրաքվեի առումով: Երկրի խորհրդարանը եւս սեպտեմբերի 23-ին արտահերթ նիստ կհրավիրի Իրաքի իրավիճակի քննարկման նպատակով:
