Հայաստանի իշխանությունները Իրան-Հայաստան երկաթգծի ներդրումային գործընկերոջից ակտիվ գործունեություն կպահանջեն: Այս մասին սեպտեմբերի 26-ին՝ մամուլի ասուլիսի ժամանակ, հայտարարել է Հայաստանի տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը՝ նշելով, որ վերջին 1-2 ամիսների ընթացքում Դուբայում գործող «Ռասիա ՖԶԷ» ներդրումային ընկերության ղեկավարի հետ մի քանի հանդիպումներ է ունեցել: Ընկերությունը նախարարության հետ դեռ 2013 թվականին հուշագիր էր ստորագրել երկաթգծի արժեքի 60 տոկոսի չափով գումար գտնելու մտադրության մասին, որը 3.2 միլիարդ դոլար է գնահատվել: Դրանից հետո, սակայն, ընկերությունը սննկացել է: Նախարարի հավաստմամբ՝ ընկերությունը ցանկանում է ոտքի կանգնել եւ նպատակ կա վերանայելու կնքած համաձայանգիրը:
«Մենք այդ հարցերը քննարկել ենք ընկերության ղեկավար Ջոզեֆ Բորկովսկիի հետ», - հավելել է նախարարը:
