Մենք պետք է մաքսիմալ քայլեր ձեռնարկենք՝ Հայաստանի եւ Իրաքնի միջեւ ապրանքաշրջանառության ծավալների աճ ապահովելու համար, քանի որ դրա համար մեծ ներուժ ունենք: Այս մասին, այսօր՝ սեպտեմբերի 26-ին, հայ-իրաքյան միջկառավարական հանձնաժողովի համանախագահ, Իրաքի գյուղատնտեսության նախարար Ֆալահ Հասան Զիդան ալ-Լուհայիբիի հետ հանդիպման ժամանակ նշել է ՀՀ վարչապետ Կարեն Կարապետյանը:
Կառավարությունից NEWS.am-ին հայտնում են, որ վարչապետը կարեւորել է Իրաքի հետ հարաբերությունների շարունակական զարգացումը եւ վստահություն հայտնել, որ Երեւանում տեղի ունեցած հայ-իրաքյան միջկառավարական հանձնաժողովի նիստը կնպաստի երկկողմ կապերի սերտացմանն ու ամրապնդմանը: Կարեն Կարապետյանը հեռանկարային է համարել գյուղատնտեսության, էներգետիկայի, զբոսաշրջության, կրթության ոլորտներում համագործակցությունը: «Մենք պետք է մաքսիմալ քայլեր ձեռնարկենք՝ երկու երկրների միջեւ ապրանքաշրջանառության ծավալների աճ ապահովելու համար, քանի որ դրա համար մեծ ներուժ ունենք»,- նշել է կառավարության ղեկավարը՝ կարեւորելով միջկառավարական հանձնաժողովի ակտիվ աշխատանքն ու առեւտրային պալատների միջեւ փոխգործակցության սերտացումը:
Ֆալահ Հասան Զիդան ալ-Լուհայիբին Կարեն Կարապետյանին է փոխանցել Իրաքի վարչապետի ջերմ ողջույններն ու բարեմաղթանքները՝ համոզմունք հայտնելով, որ Երեւանում կայացած միջկառավարական հանձնաժողովի նիստը կնպաստի Հայաստանի ու Իրաքի միջեւ ավելի ամուր եւ խորը հարաբերությունների ձեւավորմանը: Նա ընդգծել է, որ պատրաստ են ամեն ինչ անել՝ նիստի ընթացքում ձեռք բերված պայմանավորվածությունները կյանքի կոչելու համար, ինչը, նրա խոսքով, թույլ կտա կտրուկ ավելացնել երկկողմ առեւտրաշրջանառության ծավալները: «Մենք շահագրգռված ենք ներմուծել հայկական մրցունակ եւ որակյալ գյուղատնտեսական եւ այլ ապրանքներ: Իրաքն ունի էելկտրաէներգիայի պակաս, եւ մենք կարող ենք քննարկել նաեւ Հայաստանում արտադրվող էլեկտրաէներգիայի արտահանման հարցը»,- ասել է միջկառավարական հանձնաժողովի իրաքյան կողմի համանախագահը: Նա կարեւորել է նաեւ զբոսաշրջության ոլորտում համագործակցությունն ու իրաքցի ուսանողների՝ հայաստանյան բուհերում ուսում ստանալու համար բարենպաստ պայմանների ստեղծման հարցը: Այդ առումով Ֆալահ Հասան Զիդան ալ-Լուհայիբին անհրաժեշտ է համարել դիտարկել վիզային ռեժիմի դյուրացման հնարավորությունները:
Վարչապետ Կարապետյանը վստահություն է հայտնել, որ երկու երկրների միջեւ ձեռք բերված բոլոր պայմանավորվածությունները հնարավորինս արագ կյանքի կկոչվեն՝ ի շահ երկու ժողովուրդների:
