Ուկրաինայի Վիննիցայի մարզի Կալինովկա քաղաքում՝ երկրի սպառազինությունների խոշորագույն պահեստում, սեպտեմբերի 26-ի երեկոյան հրդեհ է բռնկվել, հայտնում է  112.ua–ն։

Հրդեհը բռնկվել էր ժամը 22։00–ի սահմաններում։ Բաց աղբյուրների տեղեկություններով՝ զինանոցում պահվում է 188 հազար տոննա զենք–զինամթերք։ Զինանոցի մակերեսը 60 հա է։ Ուկրաինայի Գլխավոր շտաբում հայտարարել են, որ հրդեհի մակերեսը զինանոցի ընդհանուր մակերեսի 10 տոկոսն է։ Հրդեհից տուժել է 2 մարդ, նրանց այրվածքները ծանր չեն։

Սեպտեմբերի 27-ի ժամը 8։00–ի դրությամբ շրջանից տարհանվել է մոտ 30 հազար մարդ։ Պայթյունները առավոտվա դրությամբ դեռ շարունակվում էին։ Հրդեհի պաշտոնական պատճառը դեռ հայտնի չէ։ Ուկրաինայի ԶՈւ Գլխավոր շտաբում չեն բացառել դիվերսիայի վարկածը։