Մենք պատրաստ ենք խթանել հայ-ղազախական գործարար կապերը: Այս մասին, այսօր՝ սեպտեմբերի 28-ին, Ղազախստանի Հանրապետության առաջին փոխվարչապետ Ասկար Մամինի հետ հանդիպման ժամանակ նշել է ՀՀ վարչապետ Կարեն կարապետյանը:
Կառավարությունից NEWS.am-ին հայտնում են, որ Հայաստանի եւ Ղազախստանի միջեւ համագործակցության զարգացման համատեքստում վարչապետ Կարապետյանը կարեւորել է բոլոր մակարդակներում պաշտոնական հաճախակի փոխայցերը եւ քննարկումները: «Մենք պատրաստ ենք դիվերսիֆիկացնել եւ զարգացնել առեւտրատնտեսական համագործակցությունը, պատրաստ ենք խթանել հայ-ղազախական գործարար կապերը», - նշել է կառավարության ղեկավարը: Կարեն Կարապետյանը հեռանկարային է համարել տնտեսության մի շարք ոլորտներում փոխգործակցության խորացումը՝ նշելով, որ առկա է համատեղ ծրագրեր նախաձեռնելու լուրջ ներուժ:
Ղազախստանի փոխվարչապետ Ասկար Մամինի խոսքով՝ Ղազախստանը եւս հետաքրքրված է Հայաստանի հետ առեւտրատնտեսական կապերի աշխուժացմամբ եւ պատրաստ է առարկայորեն քննարկել համատեղ ծրագրերի իրականացման հնարավորությունները: «Լիովին համակարծիք եմ Ձեզ հետ: Մենք պատրաստ ենք եւ հենց այդ նպատակով էլ եկել ենք Հայաստան», - ասել է Ասկար Մամինը: Նա ներկայացրել է ՀՀ եւ ՂՀ միջեւ տնտեսական համագործակցության միջկառավարական հանձնաժողովի նիստի ընթացքում քննարկված հարցերի շրջանակը եւ ձեռք բերված պայմանավորվածությունները:
Զրուցակիցները կարեւորել են միջկառավարական հանձնաժողովի ակտիվ ու գործնական աշխատանքը, անդրադարձել են նաեւ երկու երկրների միջեւ տրանսպորտային հաղորդակցության կազմակերպման եւ լոգիստիկ սխեմաների մշակման հարցին: Կողմերը պայմանավորվածություն են ձեռք բերել՝ շարունակել ակտիվ շփումներն ու պարբերաբար անհրաժեշտ տեղեկատվություն փոխանակել: