2017 թվականի սեպտեմբերի 14-ին Ինեկոբանկը միկրոֆինանսավորման նպատակով վարկային միջոցներ է ստացել responsAbility Investments AG կազմակերպության հիմնադրամների կողմից՝ ընդհանուր 12 մլն. ԱՄՆ դոլարի չափով:
Այսպիսով, Ինեկոբանկի եւ responsAbility Investments AG հիմնադրամների միջեւ կնքված պայմանագրերի ընդհանուր մնացորդը կազմեց շուրջ 30 մլն. ԱՄՆ դոլար, ինչը վկայում է կազմակերպությունների միջեւ արդյունավետ եւ երկարաժամկետ համագործակցության մասին: 12 մլն ԱՄՆ դոլար ֆոնդերը Ինեկոբանկի կողմից կուղղվեն միկրո բիզնեսի ոլորտ` նպաստելով տնտեսական զարգացմանն ու նոր աշխատատեղերի ստեղծմանը:
«Մենք ուրախ ենք եւս մեկ անգամ ամրապնդել երկարաժամկետ եւ կայուն հարաբերությունները մեր կառույցների միջեւ, որոնք ուղղված են մեր հաճախորդների համար էլ ավելի գրավիչ առաջարկների ստեղծմանը» - նշեց Ինեկոբանկի գործադիր տնօրենի ժամանակավոր պաշտոնակատար Գառնիկ Թադեւոսյանը:
responsAbility Investments AG հիմնադրամը հանդիսանում է ակտիվների կառավարման առաջատար կազմակերպություններից մեկը աշխարհում, որն առաջարկում է ներդրումային ճկուն եւ պրոֆեսիոնալ լուծումներ ինչպես անհատ ներդրողների, այնպես էլ կազմակերպությունների համար: Կազմակերպության ներդրումային գործիքները զարգացող երկրներում եւ նոր ձեւավորվող տնտեսական շուկաներում նորաստեղծ կազմակերպությունների համար ապահովում են ֆինանսավորում վարկերի եւ կապիտալի տեսքով: Այս գործունեության շնորհիվ այդ ընկերություններն օգնում են բավարարել բնակչության լայն շերտերի հիմնական պահանջները եւ խթանել տնտեսական զարգացումը` հանգեցնելով երկրների բարգավաճմանը երկարաժամկետ հեռանկարում:
