Ադրբեջանցի քաղաքագետն առաջարկում է Իսպանիային ավելացնել ԵԱՀԿ Մինսկի խմբի կազմում, քանի որ Մադրիդը կարող է Ադրբեջանին աջակցել:
«Ադրբեջանական կողմը բազմիցս դժգոհել է ԵԱՀԿ Մինսկի խմբի գործունեությունից: Այնուամենայնիվ, կարծում եմ, որ ԵԱՀԿ Մինսկի խմբի ձեւաչափը վերանայելու հարցում գործնական քայլեր չեն ձեռնարկվի»,- Echo.az-ին է ասել «Հարավային Կովկաս» քաղաքագետների ակումբի ղեկավար Իլգար Վելիզադեն:
Նա կարծում է, որ եթե ձեւաչափն այնուամենայնիվ փոխվի, կարող են շատ տարբերակներ լինել: «Օրինակ՝ ԵԱՀԿ ՄԽ կազմի մեջ մտնող բոլոր պետությունները կարող են հերթականությամբ համանախագահի դեր ստանձնել: Գուցե այդ երիկրները կարողանան բանակցային գործընթացի մոդերատոր դառնալ: ԵԱՀԿ ՄԽ կազմի փոփոխության հարցը եւս կարող է բարձրացվել»,- ասել է Վելիզադեն:
«Սակայն ցանկացած փոփոխություն չի կարող տեղի ունենալ առանց հակամարտության երկու կողմերի, այսինքն` Ադրբեջանին եւ Հայաստանի համաձայնության: Կարելի է ասել, որ այսօր Ադրբեջանը առավել շահագրգռված է ԵԱՀԿ Մինսկի խմբի ձեւաչափի փոփոխման հարցում, մյուս երկրները համաձայն են նրան, ինչ կա այսօր», - ասել է քաղաքագետը:
Նրա կարծիքով, լավ կլինի, որ ԵԱՀԿ Մինսկի խմբի նոր ձեւաչափում Իսպանիան ընդգրկվի: «Նա գիտի աշխատանքի առանձնահատկությունները, անջատողականության հետ կապված խնդիրների փորձ ունի, ուստի կարող է աջակցություն ցուցաբերել», - ասել է քաղաքագետը:
Ավելի վաղ ԵԱՀԿ Խորհրդարանական վեհաժողովի Հարավային Կովկասի հարցերով հատուկ ներկայացուցիչ Քրիստիան Վիգենինը հայտարարել էր, որ ԵԱՀԿ Մինսկի խմբի կազմը կարող է վերանայվել:
