Հայաստանի համար այսօրվա դրությամբ գոյություն ունի ռազմական սպառնալիք երկու պետությունների կողմից՝ Ադրբեջանի ու Թուրքիայի։ Այս մասին սեպտեմբերի 30-ին լրագրողների հետ զրույցում ասել է Հայաստանի նախկին պաշտպանության նախարար Վաղարշակ Հարությունյանը՝ «Ժամանակակից պայմաններում հիբրիդային պատերազմներին կոլեկտիվ անվտանգության համակարգի արդյունավետ հակազդման հարցերը» թեմայով Երեւանում անցկացված ՀԱՊԿ միջխորհրդարանական լսումների ժամանակ։
Նրա խոսքով՝ Ադրբեջանի հետ Հայաստանը ռազմական դրության մեջ է գտնվում, իսկ Թուրքիայի հետ մենք դիվանագիտական հարաբերություններ չունենք։ «Բացի այդ՝ Թուրքիան Հայաստանին շրջափակման մեջ է դրել։ Միջազգային տեսակետից դա ուժի կիրառում է ու պպատերազմի տարր։ Ու Բաքվում Ղարաբաղի հարցով Թուրքիայի պնախարարի վերջին հայտարարությունը հենց այդ մասին է խոսում»,- շեշտեց Վաղարշակ Հարությունյանը ։ Նման հայտարարություններով, հավելեց նախկին նախարարը , Թուրքիան խրախուսել է Ադրբեջանին 2016-ի ապրիլյան իրադարձությունների ժամանակ։
Հիշեցնենք, որ Թուրքիայի պաշտպանության նախարար Նուրեթին Ջանիկլին Ադրբեջան կատարած իր այցելության ժամանակ արել էր մի հայտարարություն, որը չափազանց ինքնավստահ է հնչում նույնիսկ «ավագ եղբոր» տեսակետից։ Նա ասել էր «Ադրբեջանն ու Թուրքիան եղբայրական պետություններ են։ Մենք միմյանց կարիքն ունենք։ Ադրբեջանական ժողովրդի ցանկությունը հրաման է մեզ հաար, մենք ձեռնարկում ենք անհրաժեշտ քայլեր»,- ասել է Թուրքիայի նախարարը։
