Խաղատներն այն օբյեկտներն են, որոնք խթանում են ներգնա տուրիզմը եւ կարող են ներդրումներ բերել: Այս մասին այսօր՝ հոկտեմբերի 3-ին, ԱԺ-ում «Շահումով խաղերի, ինտերենտ շահումով խաղերի եւ խաղատների» մասին ՀՀ օրենքում փոփոխություններ կատարելու մասին օրենքի նախագծի քննարկման ժամանակ ասաց հարակից զեկուցող, ԱԺ ՀՀԿ խմբակցության պատգամավոր Խոսրով Հարությունյանը։
ԱԺ «Ծառուկյան» խմբակցության պատգամավոր Սերգեյ Բագրատյանը հետաքրքրվեց՝ արդյոք ներդրումներ բերելու համար չկար ավելի հարմար ծրագիր, քան զվարճանքի վայրերի կառուցումն է։
«Մենք ո՞ւր ենք տանում, խաղամոլությա՞ն: Պատճառաբանությունը, որ սա ներդրումային ծրագրերին խթանելուն է միտված, խիստ կասկածելի է, այն իմաստով, որ մենք զբոսաշրջիկների համար հարմար պայմաններ ենք ստեղծում ներդրում իրականացնելու համար։ Միթե դա լավագույն ներդրումային հնարավորությունն է, այդ դեպքում հասարակաց տուն էլ կարելի էր կառուցել, որպեսզի ներդրումներն ավելի գրավիչ դառնային», - ասաց պատգամավորը։
