Միջազգային փորձագետների խումբը մոտ 2 շաբաթ տեւած հետազոտությունից հետո հայտնել է, որ «Նաիրիտ» գործարանում խոշոր աղետի սպառնալիք չկա: Այդ մասին այսօր՝ հոկտեմբերի 5-ին NEWS.am-ի թղթակցի հետ զրույցում ասացէ Հայաստանի արտակարգ իրավիճակների նախարար Դավիթ Տոնոյանը։
«Ինչպես գիտեք, «Նաիրիտ» գործարանում հրդեհի հենց հաջորդ օրը մենք դիմել էինք տարբեր միջազգային կազմակերպությունների՝ խնդրելով փորձագիտական աջակցություն տրամադրել գործարանում ուսումնասիրություն անելու համար: Մեր խնդրանքին առաջիններից մեկն արձագանքեց ՄԱԿ-ի մարդասիրական գործերը համակարգող գրասենյակը, որի օգնությամբ Երեւան ժամանեց 3 բարձրակարգ փորձագետ (Ֆրանսիայից, Շվեյցարիայից եւ Շվեդիայից): Մոտ 2 շաբաթ տեւած հետազոտությունից հետո փորձագիտական խմբի անդամները հայտնեցին, որ «Նաիրիտ» գործարանում խոշոր աղետի սպառնալիք չկա»,- նշեց նախարարը:
Տոնոյանի խոսքով, փորձագետները ծանոթացել են գործարանում արտադրության տեխնոլոգիաներին, ուսումնասիրել այնտեղ առկա տարբեր քիմիական նյութերի ծավալը, վիճակը, դրանց պահպանության պայմանները, տարաներն ու պահեստարանները, ռիսկերն ու հնարավոր ազդեցությունը մարդկանց եւ շրջակա միջավայրի վրա: «Փորձագետները կատարել են նաեւ առկա նյութերի մանրամասն գույքագրում եւ դասակարգում: Իրականացված մանրակրկիտ հետազոտության հիման վրա մշակվում են տեխնիկական առաջարկներ՝ տեղում ժամանակավոր պահպանման ենթակա նյութերի պատշաճ պիտակավորման, ժամանակակից չափանիշներով վերափաթեթավորման, համապատասխան պահեստարաններում պահպանության եւ կառավարման ապահովման համար»,- նշեց նախարարն ու հավելեց. «Կառավարումը ենթադրում է քիմիական վտանգավոր նյութերի պահպանություն, վերամշակում կամ արդիական, անվտանգ եղանակով ոչնչացում՝ հնարավոր աղետի ռիսկը նվազեցնելու նպատակով»: