Սերժ Սարգսյանն փորձում է 2018 թվական մտնել որպես վարչապետ Սարգսյան, ով չի ունենա նախագահ Սարգսյանի բեռը: Այդ մասին, այսօր՝ հոկտեմբերի 10-ին, «Հայ-թուրքական հարաբերությունները արձանագրությունների ստորագրումից առաջ եւ հետո» թեմայով քննարկման ժամանակ նշել է Միջազգային եւ անվտանգության հարցերի հայկական ինստիտուտի ասոցացված փորձագետ Գեւորգ Մելիքյանը՝ հավելելով, որ Սերժ Սարգսյանն ունի իմիջի խնդիր թե երկրի ներսում, թե Սփյուռքում։
Նրա կարծիքով, 2008 թվականի հայ-թուրքական գործընթացը փրկության օղակ էր Սերժ Սարգսյանի համար, քանի որ ընտրություններից հետո իրավիճակը շատ լարված էր։ «Այդ քննարկումների ակտիվացմամբ նա հասավ ֆուտբոլային դիվանագիտության,ապա նաեւ ստորագրվեցին արձանագրությունները։ Սերժ Սարգյանը շատ լավ գիտակցում էր, որ այդ արձանագրությունները մեռած էին դրանց ստորագրման պահից։ Նա փորձում է շահած դուրս գալ, քանի որ կստորագրվեին դրանք թե չէ, նա մտածում էր իր հեղինակության մասին»,-նշեց նա։
Իր խոսքի վերջում Մելիքյանն ասաց, որ այդ արձանագրությունների հիմնական խոչընդոտը Արցախի խնդիրն է, իսկ այսօր չպետք է որեւէ քայլ ակնկալել Թուրքիայից, առնվազն մինչեւ 2019 թվականը։
«Անկարան այսօր զբաղված է ներքին խնդիրներով, հատկապես 2019 թ․ ընտրություններին ընդառաջ։ Իսկ հայկական արձանագրություններն ու Ցեղասպանության հարցը Թուրքիայի քաղաքական օրակարգի 50-յակում էլ չկա»,-ասաց նա:
