Մշտապես բարձր մակարդակով հանդիպումներից առաջ Ադրբեջանը լարում է իրավիճակը թե հայ-ադրբեջանական սահմանին, թե Արցախ-Ադրբեջան շփման գծում։ Այս մասին այսօր՝ հոկտեմբերի 11-ին, Ազգային ժողովում լրագրողների հետ զրույցում ասել ՀՀԿ-ական պատգամավոր, Աժ պաշտպանության եւ անվտանգույթան հարցերով մշտական հանձնաժողովի նախագահ Կորյուն Նահապետյանը։
«Բարձր մակարդակով հանդիպումից կամ միջնորդների այցելությունից առաջ իրավիճակը ավելի լարվում է թե հայ-ադրբեջանական սահմանին, թե արցախա-ադրբեջանական շփման գծում։ Սա նշանակում է, որ մեր զգոնությունը միշտ պետք է բարձր պահենք, զինված ուժերը իրենց մարտավարական կանխատեսումները պետք է նկատի ունենան։ Նման հանդիպումներից առաջ լարումը մեծանում է։ Ադրբեջանը ուզում է ցույց տալ մի պարզ բան, որ չունի հստակ պատրաստակամություն խաղաղ ճանապարհով խնդիրը կարգավորելու եւ ռազմական ագրեսիան, նման գործողություններն իր քաղաքականության մասն են կազմում։ Վերջին տարիների ընթացքում այս փաստը արձանագրվում է։ Իհարկե, խորը մտահոգություն է առաջացնում սա»,-ասել է ՀՀԿ-ական պատգամավորը՝ միջնորդների ուշադրությունը հրավիրելով այս խնդրի վրա։
«Միջնորդներից ակնկալում ենք հստակ հասցեական արձագանք։ Թող նախատեսեն հետաքննության մեխանիզմներ, ինչի մասին պայմանվորվել ենք թե Սանկտ Պետերբուրգում, թե Վիեննայում։ Այս բոլոր պայմանավորվածությունները արձանագրվել են։ Մենք ասել ենեք, որ Ադրբեջանը պատրաստ չէ կատարել այս պարտավորությունները»,-ասաց նա:
