ԱՄՆ նախագահ Դոնալդ Թրամփը նախորդ վարչակազմի կողմնակիցների հետ ներքին պայքար է ակտիվացնում: NEWS.am-ի թղթակցին այսպիսի կարծիք է հայտնել իրանագետ Կարինե Գեւորգյանը՝ մեկնաբանելով այն իրավիճակը, որը ծագել է Թրամփի՝ Իրանի միջուկային ծրագրի վերաբերյալ համաձայանգրից դուրս գալու մասին հայտարարելուց հետո:
Նրա խոսքով՝ ԱՄՆ-ն, միակողմանիորեն դուրս գալով համաձայնագրից, չի կարող չեղյալ համարել տվյալ համաձայնագրի ուժը:
«Ի թիվս այլ բաների, օրենսդրական մակարդակում այն պահանջում է Կոնգրեսի եւ Սենատի հավանությունը, որոնք էլ արդեն հայտնել են այս քայլի իրավաչափության մասին իրենց կասկածները»,- ասել է նա , հավելելով, որ Եվրամիության արտաքին գործերի եւ անվտանգության քաղաքականության գերագույն հանձնակատար Ֆեդերիկա Մոգերինին արդեն բավական կոշտ հայատարարել է, որ համաձայնագիրը ստորագրած եվրոպական երկրների կարծիքը կտրուկ տարբերվում է ԱՄՆ նախագահի դիրքորոշումից:
Այս դեպքում, ըստ նրա, Թրամփը մենակության մեջ է հայտնվում: Նրա կարծիքով, եթե Սենատը եւ Կոնգրեսը սատարեն նախագահին, ԱՄՆ-ն կկարողանա դուրս գալ համաձայնագրից:
Նա նշել է նաեւ, որ Իրանում Թրամփի հայտարարությանը բավական հանգիստ են վերաբերվել, քանի որ հասականում են ԱՄՆ-ի դուրս գալը համաձայանգրից չի բխում նրա եվրոպացի գործընկերների շահերից:
«Բացի այդ իրենց դաշնակիցներին համոզելու համար ԱՄՆ-ն պետք է լուրջ ապացույցներ ներկայացնի: Իսկ նա դա ֆիզիկապես անել չի կարող, քանի որ չունի ապացույցներ»,- ասել է նա: