Միացյալ Նահանգների նախագահ Դոնալդ Թրամփը նոյեմբերի 3-ից 14-ը շրջագայության կմեկնի Ասիայի երկրներ՝ այցելելով Ճապոնիա, Հարավային Կորեա, Չինաստան, Վիետնամ, Ֆիլիպիններ եւ Հավայան կղզիներ: Այս մասին հաղորդում է Սպիտակ տան մամուլի ծառայությունը: Շրջագայությունը տեղի կունենա ԿԺԴՀ միջուկային եւ հակահրթիռային ծրագրերի շուրջ լարվածության աճի ֆոնին, հաղորդում է «Ամերիկայի ձայնը»:
Թրամփը «կոչ կանի միջազգային հանրությանը միավորել ջանքերը ԿԺԴՀ վրա ճնշումը առավելագույնի հասցնելու համար, ինչպես նաեւ կհանդիպի Ճապոնիայի քաղաքացիների ընտանիքների հետ, որոնց Հյուսիսային Կորեան առեւանգել էր:
Այցի ընթացքում Թրամփը կընդգծի իր հավատարմությունը ԱՄՆ դաշնակիցներին ու գործընկերներին եւ Ասիա-խաղաղօվկիանոսյան տնտեսական համագործակցության եւ Հարավարեւելյան Ասիայի երկրների ասոցիացիայի շրջանակներում կայցելի մի շարք միջոցառումների:
Նա կհանդիպի նաեւ Չինաստանի նախագահ Սի Ցզինպինին եւ Ճապոնիայի վարչապետ Սինձո Աբեին, Ֆիլիպինների նախագահի Ռոդրիգո Դուտերտեին եւ Վիետնամի նախագահ Չան Դայ Կուանգային: