Տեսանելի չէ միջազգային օրակարգում Սիրիայի ճգնաժամի կարգավորման խնդրի փակումը: NEWS.am-ի հետ զրույցում այսպիսի տեսակետ հայտնեց «Մոդուս Վիվենդի» վերլուծական կենտրոնի տնօրեն Արա Պապյանը:
Նրա խոսքով՝ եթե խոսքը վերաբերում է Սիրիայում մինչպատերազմական իրավիճակի վերականգնմանը, ապա միանշանակ կարելի է ասել, որ սիրիական խնդիրը չի լուծվել:
«Եթե խոսքն այն մասին է, որ Ասադը կվերահսկի Սիրիայի ամբողջ տարածքը, ապա՝ ոչ: Այս մասին չի կարող խոսք լինել, քանի որ նա այն չի վերահսկում: Նա չի վերահսկում անգամ սիրիացի քրդերին: Նա չի վերահսկում Հյուսիսը, որտեղ ներխուժել է Թուրքիայի զորքը»,- պարզաբանեց Պապյանը՝ հավելելով, սակայն, որ խոսքն ավելի շուտ այն մասին է, որ Ռուսաստանը կատարել է իր առջեւ դրված խնդիրը եւ վերահսկողություն է հաստատել Լաթաքիայի առափնյա շրջաններում:
Փորձագետը նշեց, որ սիրիացի քրդերին ամերիկացիներն են աջակցում, եւ որ երկրի Արեւելքում խնդիրը լուծելու համար Բաշար Ասադը կարող է հույսը դնել միայն Իրանի աջակցության վրա, քանի որ Սիրիայի իշխանություններն ի զորու չեն սեփական ուժերով այս խնդիրը լուծել:
