Մյանմայից 15 հազար ռոհինջա փախստական Բանգլադեշի հետ սահմանին է կուտակվել: Այս մասին հաղորդում է ՄԱԿ Փախստականների հարցերով վարչությունը:
Այս մարդիկ մինչեւ վերջին պահը մնացել են Ռաքխայն նահանգի իրենց տներում՝ չնայած հաշվեհարդարի սպառնալիքներին, սակայն արդյունքում ստիպված էին փախչել. նրանց գյուղերն ամբողջությամբ այրել են:
Կիրակի եւ երկուշաբթի նրանք հատել են Բանգլադեշի հետ սահմանը, տեղավորվել Անջուման Պարա գյուղի մոտակա դաշտերում:
Նրանք այժմ սպասում են մերձսահմանային տարածքը լքելու թույլտվությանը: Փախստականներն սահմանին մինչեւ հիմա Մյանմայի կողմից կրակոցների ձայներ են լսում:
ՄԱԿ տվյալներով՝ օգոստոսի 25-ից, երբ Ռաքխայն նահանգում բռնության ալիք էր տարածվել, Բանգլադեշ է փախել 582 հազար մարդ:
