Ղազախստանի ԱԳ նախարարությունը հնարավոր է համարել Սիրիայի ճգնաժամի կարգավորման հարցով Աստանայում 7-րդ միջազգային հանդիպմանը նոր մասնակիցների հայտնվելու հավանականությունը: Այս մասին երկուշաբթի լրագրողներին հայտնել է Ղազախստանի ԱԳ նախարար Կայրաթ Աբդրահմանովը:
«Ո՛չ, չեմ բացառում, ամեն ինչ կախված է այն բանից, թե երաշխավոր երկրները որքանով կկարողանան ամբողջ աշխատանքը հիմա համակարգել»,- ասել է նա՝ ի պատասխան բանակցությունների նոր մասնակիցների հավանականության մասին հարցին:
Նախարարի խոսքով՝ խորհրդակցությունների մասնակիցների կազմը հայտնի կդառնա «այս շաբաթվա ընթացքում»:
Հիշեցնենք, որ Սիրիայի ճգնաժամի կարգավորման հարցով 6-րդ միջազգային հանդիպումը Աստանայում տեղի է ունեցել սեպտեմբերի 14-15-ին: Ղազախստանի մայրաքաղաքում 7-րդ հանդիպումը նախատեսված է հոկտեմբերի 30-31-ին, փոխանցում է ՏԱՍՍ-ը:
