Tesla էլեկտրամոբիլների ամերիկյան արտադրողը մտադիր է սեփական ձեռնարկությունը հիմնել Շանհայի ազատ առեւտրի գոտում, գրում է Wall Street Journal–ը՝ վկայակոչելով իր աղբյուրները։

Պարբերականի տվյալներով՝ գործարքը առաջին նմանատիպ համաձայնագիրը կդառնա Չինաստանի եւ օտարերկրյա ավտոարտադրողի միջեւ։ Ավելի վաղ ավտոմոբիլային ընկերությունները համատեղ գործունեություն ծավալում էին տեղի ընկերությունների հետ, սակայն ստիպված էին կիսել շահույթը եւ բացահայտել տեխնոլոգիական գաղտնիքները։

Պարբերականը գրում է, որ ընկերությունը համաձայնության է եկել տեղի իշխանությունների հետ, որ իրենք արտադրական հիմնարկ են ունենալու, որն ամբողջովին պատկանելու է Tesla–ին։ Կողմերն այս պահին մշակում են համաձայնագրի մասին հայտարարության մանրամասները։