2016 թվականի Ապրիլյան պատերազմը ոչ թե պարզապես ադրբեջանական կազմավորումների հարձակում էր, այլ լայնամասշտաբ պատերազմ: Այս մասին «Վոեննի դիպլոմատ» կայքին տված հարցազրույցում ասել է ԼՂՀ նախագահ Բակո Սահակյանը։
Նրա խոսքով՝ այս հարձակման նպատակը կայծակնային պատերազմի միջոցով ղարաբաղյան պետականության ոչնչացումն էր:
«Այս «բլիցկրիգը» տապալվեց, եւ ագրեսորը չհասավ իր առջեւ դրած եւ ոչ մի նպատակի: Պաշտպանության բանակը հերթական անգամ մարտունակության բարձր մակարդակ ցուցադրեց, իսկ մեր ժողովուրդը՝ անխախտելի կամք, անձնազոհություն եւ մեծ հայրենասիրություն:
Սակայն սա չի նշանակում, որ մենք թերություններ եւ բացթողումներ չենք ունեցել: Ցանկացած պատերազմ երեւան է բերում այս կարգի խնդիրները: Եվ հիմնական խնդիրն այն է, որ պաշտպանական համակարգը մշտապես կատարելագործվի՝ հաշվի առնելով ռազմաքաղաքական իրավիճակի փոփոխությունը, գիտատեխնիկական առաջընթացի զարգացումը եւ այլ շատ գործոններ: Այս ուղղութամբ մենք հնարավոր ամեն ինչ անում ենք՝ կատարելով հետեւողական եւ քրտնաջան աշխատանք»,- հայտարարել է Բակո Սղահակյանը:
