Հայաստանի Ազգային ժողովն այսօր՝ հոկտեմբերի 25-ին, շարունակում է իրաշխատանքը: Նախօրեին խորհրդարանը քննարկել է մի շարք օրինագծեր, այդ թվում «Պաշտպանության մասին» օրենքի նախագիծը: Այն ընդունվեց 86 կողմ եւ 9 դեմ ձայներով:
«Պաշտպանության մասին» օրինագիծը երեկ խորհրդարանում ներկայացրել է հիմնական զեկուցող ՀՀ պաշտպանության նախարար Վիգեն Սարգսյանը: Նա մանրամասնել է օրինագծի դրույթները՝ նշելով, որ օրինագծով զինված ուժերի գլխավոր շտաբի պետը խաղաղ պայմաններում ենթարկվում է պաշտպանության նխարարին, իսկ պատերազմի ժամանակ՝ գերագույն գլխավոր հրամանատարին: Օրինագծով սահմանվում են ՀՀ վարչապետի լիազորությունները, ըստ որոնց՝ պատերազմ հայտարարելու դեպքում որպես զինված ուժերի գերագույն հրամանատար վարչապետն ընդունում է պատերազմական ժամանակի քաղաքական եւ ռազմական բնույթի որոշումներ, իրականացնում է պաշտպանության ոլորտում, զորահավաքային նախապատրաստության եւ զորահավաքի գործընթացում օրենքով սահմանված այլ լիազորություններ:
Այսօր խորհրդարանը կքննարկի նաեւ ՊՆ-ի ներկայացրած եւս մեկ օրենքի նախագիծ՝ «Զինվորական ծառայության եւ զինծառայողի կարգավիճակի մասին»: Այս նախագծով հանվում է զինակոչիկների համար տարկետման իրավունքը, ինչը բուռն քննարկումների առիթ է դարձել հասարակության շրջանում:
Նշենք, որ ԱԺ նիստում «Զինվորական ծառայության եւ զինծառայողի կարգավիճակի մասին» ՀՀ օրենքի նախագծի քննարկման համար սահմանվել է 4 ժամ, իսկ «Պաշտպանության մասին» ՀՀ օրենքի նախագծի քննարկման համար՝ 3 ժամ տեւողություն:
ՀՀ ԱԺ վեցերորդ գումարման երկրորդ նստաշրջանի օրակարգի նախագծում ընդգրկվել են 15, իսկ հոկտեմբերի 24-ին գումարվող հերթական նիստերի օրակարգի նախագծում՝ 39 հարց:
