Գյումրիի մանկավարժական համալսարանի նախկին ռեկտրոն, «Ծառուկյան» դաշինքի պատգամավոր Վարդեւան Գրիգորյանը «Զինվորական ծառայության ու զինծառայողի կարգավիճակի» մասին օրենքի նախագիծը խնդրահարույց է համարում միայն այն բանի համար, որ ուսման տարկետումը հանելով`բուհի պետական ֆինանսավորումը կավարտվի:
«Իհարկե, բացասական ազդեցություն կունենա: Օրինակ, Շիրակի համալսարանում տղաների մոտավորապես 50 տոկոսը ընդունվում էին տարկետման իրավունքով եւ օգտվելով տարկետման իրավունքից` կառավարությունը որոշակի գումարներ փոխհատուցում էր: Եթե չեղավ տարկետումը, այդ փոխհատուցումը ավելի կնվազի եւ ուսանողների նվազման պայմաններում, ֆինանսական խնդիրներ կծագի»,-ասաց նա:
Բացի այս խնդրից պատգամավորը այլ խնդիրներ չի տեսնում, ավելին` իշխանության ներկայացուցիչների նման պնդում է, որ այս նախագծի ընդունմամբ սոցիալական արդարություն է հաստատվելու, հոգեբանական եւ սոցիալական խնդիրներ են լուծվելու:
«Կա այլընտրանք. նույն բակալավրի շրջանակներում ուսանողը կարող է պաշտպանության նախարարության հետ պայմանագիր կնքի եւ Վազգեն Սարգսյանի անվան ակադեմիայում անցնի դասընթացներ ու ավարտելուց հետո բանակ զորակոչվի որպես սպա` բարձր վարձատրությամբ: Եթե այլընտրանքային ծառայության անցնելու ցանկություն ունես, քեզ մեծ հնարավորություն է տրված: Գումարած դրան, որ դու ավարտելուց հետո կարող ես բարձր աշխատավարձով աշխատանք գտնել: Դա խթան է աշխատանք գտնելու համար»,-ընդգծեց Վարդեւան Գրիգորյանը:
Դիտարկմանը, որ սոցիալական արդարության խնդիրը կարող է եւ չլուծվել, քանի որ պաշտոնյաների որդիները այս դեպքում՝ կազատվեն առողջական փաստաթղթերը կեղծելով, կամ պաշտպանության նախարարությունում «պատսպարվելով», պատգամավորն արձագանքեց. «Իմ կարծիքով սոցիլական արդարության խնդիրն է լուծվում, որովհետեւ նույն ձեւով միշտ հարց է բարձրացվում, որ պաշտոնյաների երեխաները չեն ծառայում բանակում, լավագույն դեպքում կենտրոնում են ծառայում: Ինձ համար ընդունելի է, որ այլընտրանքային հնարավորություն է տրված երիտասարդ ուսանողին՝ իր հետագա ծառայությունը կազմակերպելու համար, որ ոչ թե սովորական զինվոր է զորակոչվում բանակ, այլ գնում է որպես սպա: Այսինքն` մեր բանակում խնդիրը հենց էդ տարիքի մեջ էր նաեւ, որ բակալավրիատը ավարտում էր եւ արդեն 22 տարեկան հասակում բանակ էր գնում ու իր հրամանատարը 18 տարեկան էր, դա խնդիր էր: Հիմա որպես սպա է գնում, որպես կառավարիչ>:
