Ադրբեջանը պետք է մնա Եվրոպայի խորհրդում եւ ապացուցի իր հավատարմությունը ժողովրդավարական արժեքներին: Այս մասին haqqin.az-ին ասել է ԵԱՀԿ Խորհրդարանական վեհաժողովի փոխնախագահ, Շվեդիայի խորհրդարանի «Մոդերատոր» կուսակցությունից պատգամավոր Մարգարետ Սեդերֆելտը, որը Եվրոպայի հետ Ադրբեջանի հարաբերությունները շատ կարեւոր է համարել:
«Վերջին շրջանում մեզ չեն կարող չհիասթափեցնել այն տեղեկությունները, որ Ադրբեջանը ցանկանում է Եվրոպայի խորհրդից դուրս գալ: Եվրոպական կառույցներ մտնելով՝ երկիրը կամավոր ստանձնել է երկրի ժողովրդավարացման պարտավորություն, եւ մեզ համար բավականին կարեւոր է Բաքվի կողմից իր խոստումների կատարումը: Դրա հետ մեկտեղ, եթե Բաքվի մոտ եվրոպական կառույցների հետ խնդիրներ են ծագել, ապա դրանք պետք է լուծել երկխոսության ճանապարհով: Այս ընթացքում անչափ կարեւոր է կողմերի միջեւ վստահության ապահովումը: Կարող եմ հստակ ասել, որ Եվրոպայում ոչ մեկը չի ձգտում Ադրբեջանին ամեն գնով պատժել: Այստեղ մեզ երբեմն կշտամբում են, որ մենք պարտավորությունների կատարում ենք պահանջում միայն Ադրբեջանից, բայց չէ՞ որ Ռուսաստանի նկատմամբ էլ ԵԽ-ն պատժամիջոցներ կիրառեց: Մենք եվրոպական արժեքների նկատմամբ հարգանք ենք պահանջում ե՛ւ Ադրբեջանից, ե՛ւ Ռուսաստանից, ե՛ւ Հայաստանից, ե՛ւ մյուս բոլոր երկրներից: Մեր կարծիքը հետեւալն է՝ Ադրբեջանը պետք է մնա կազմակերպությունում եւ ապացուցի իր հավատարմությունը ժողովրդավարական արժեքներին»,- կարծում է ԵԱՀԿ ԽՎ փոխնախագահը՝ նշելով, որ Բրյուսելում Արեւելյան գործընկերության առաջիկա գագաթնաժողովը կարեւոր նշանակություն կունենա Եվրոպայի եւ Ադրբեջանի հարաբերությունների զարգացման համար:
Լեռնային Ղարաբաղի հակամարտության խնդրին անդրադառնալով՝ Մ. Սեդերֆելտը շեշտեց, որ սա անչափ բարդ հակամարտություն է եւ դրանով զբաղվում է ԵԱՀԿ Մինսկի խումբը, ուստի ինքը զգուշանում է հայտարարություն անել, որը կարող է բանակցային գործընթացում որոշակի լարվածություն առաջացնել:
