Հայ եւ հնդիկ գործարարների միջեւ համագործակցության մեծ ներուժ կա։ Այս մասին DD News–ին տված հարցազրույցում ասել է ՀՀ նախագահ Սերժ Սարգսյանը։
«Մասնակցելով համաշխարհային պարենամթերքի տոնավաճառին՝ ես իմացա, որ Հնդկաստանում վերամշակվում է մրգերի եւ բանջարեղենի միայն 10 տոկոսը»,– ասել է նախագահը՝ հավելելով, որ Հայաստանում եւ Հնդկաստանում կան մրցունակ մթերքներ։
Նախագահը կարծում է, որ անհրաժեշտ է կոնկրետ քայլեր ձեռնարկել այդ մթերքները համապատասխան շուկաներում ներկայացնելու համար։ Հայաստանը մեծ նշանակություն է տալիս գյուղատնտեսական մթերքների վերամշակմանը, եւ մենք այդ ուղղությամբ լավ փորձ ունենք։
«Մենք կարող ենք հնդիկ ձեռներեցներին առաջարկել փոխանակել լավագույն պրակտիկան եւ ստեղծել համատեղ ձեռնարկություններ Հնդկաստանում»,– ասել է նա՝ հավելելով, որ հայերը, որոնք ապրում են ամբողջ աշխարհում, հաջողության են հասել սննդամթերքի արտադրության ոլորտում։
Նախագահ Սարգսյանը պարզաբանել է, որ Հայաստանում նույնպես կարող են համատեղ ձեռնարկություններ ստեղծվել, որոնք կօգտագործեն հնդկական հումքը։
Մեկ այլ կարեւոր ասպեկտ է ԵՏՄ–ում Հայաստանի անդամակցությունը, որի օգնությամբ 180-միլիոնանոց շուկան հասանելի է դառնում ձեռներեցների համար։
«Կա նաեւ մեր հարավային հարեւան Իրանը, որի բնակչությունը կազմում է 80 մլն, եւ դա տպավորիչ շուկա է»,– ասել է նա։
