ԱՄՆ-ն երկրորդ հորիզոնականն է գրավել այն երկրների ցուցակում, որոնք սուպերհամակարգիչների ամենամեծ քանակաությունն ունեն՝ առաջնորդի դիրքը զիջելով Չինաստանին: Այս մասին նշված է ամերիկյան CNET պորտալում հրապարակված զեկույցում:
Ըստ զեկույցի՝ դեռեւս 6 ամիս առաջ ԱՄՆ-ն վստահաբար գլխավորում էր այս ցուցակը՝ իր տարածքում ունենալով 169 սուպերհամակարգիչ թոփ-500 վարկանիշից, որոնց մեջ են մտնում աշխարհում ամենահզոր հաշվիչ համակարգերը: Այդ ժամանակ Չինաստանն ուներ 10 սարքով պակաս: Սակայն վեջին կես տարում Պեկինին հաջողվել է իր հզորություններն ավելացնել եւ հիմա նրա տրամադրության տակ կա 202 սուպերսարք, իսկ ԱՄՆ-ն, հակառակը, պակասեցրել՝ 144:
Դրանից զատ, Չինաստանին է պատկանում 2 ամենահզոր համակարգիչը թոփ-500-ից: Դրանցից մեկը գտնվում է Ուսի քաղաքում Սուպերհամակարգիչների ազգային կենտրոնում. այն կարող է վայրկայնում քվադրիլիոն հաշվիչ գործողություն կատարել: Երկրորդը, որը գրեթե 3 անգամ պակաս հզորություն ունի, գտնվում է Հուանչժոում Սուպերհամակարգիչների ազգային կենտրոնում:
Սուպերհամակարգիչներն օգտագործում են հազարավոր պրոցեսորներ եւ կարող են ամբողջ շենքեր զբաղեցնել: Դրանք կիրառվում են այն խնդիրների համար, որոնց լուծումը թվային մոդելավորում եւ ռեալ ժամանակում մեծ քանակությամբ տվյալների մշակում է պահանջում: Դրանց թվում են եղանակային-կլիմայական պայմանների կանխատեսումը, միջուկային փորձարկումների մոդելավորումը, օդանավերի նախագծումը եւ տիեզերական տարածքի հետազոտումը:
