Հարկային եկամուտների հավաքագրումները կատարում ենք՝ 50 տոկոսով կրճատելով ստուգումները: Այս մասին այսօր՝ նոյեմբերի 15-ին, խորհրդարանում 2018թ. պետական բյուջեի նախագծի քննարկման ժամանակ ասաց ֆինանսների նախարար Վարդան Արամյանը՝ արձագանքելով «Ծառուկյան» խմբակցության պատգամավոր Սերգեյ Բագրատյանի դիտարկմանը, թե գործարար միջավայրը խեղվում է:
«Ինչո՞ւ է ձեզ մոտ այդպիսի պատկերացում, թե մենք խեղում ենք գործարար միջավայրը: Վստահ եմ՝ նման բան չկա, բացատրեմ՝ 2017թ.-ի բյուջեի հարկային եկամուտների հավաքագրումները կատարում ենք՝ ստուգումները կրճատելով, 50 տոկոսով կրճատել ենք ստուգումները, այսինքն 50 տոկոսով քիչ ենք միջամտում տնտեսվարողի կյանքին, փոխարենը, հարկային եկամուտներն ենք կարողանում ապահովել»,- ասաց Վարդան Արամյանը:
