Առաջիկայում տեղի կունենա ՌԴ ԱԳ նախարար Սերգեյ Լավրովի այցը Ադրբեջան եւ Հայաստան: Այս մասին ճեպազրույցի ժամանակ հայտնել է ՌԴ ԱԳՆ պաշտոնական ներկայացուցիչ Մարիա Զախարովան:
Նոյեմբերի 20-21-ը Լավրովը պաշտոնական այցով Երեւան կայցելի, որտեղ հանդիպումներ են նախատեսված ՀՀ ԱԳ նախարարի եւ նախագահի հետ:
«Այցն իրականացվում է դիվանագիտական հարաբերությունների հաստատման 25-ամյակի եւ բարեկամության, համագործակցության ու փոխօգնության մասին մեծ պայմանագրի 20-ամյակի առիթով: Նախարարները կմասնակցեն «Ռուսաստան եւ Հայաստան. դարերով կոփված բարեկամություն» ցուցահանդեսի բացմանը, ինչպես նաեւ այս հոբելյանին նվիրված հայկական դրոշմանիշի մարման արարողությանը:
«Օրակարգն ընդգրկում է մեր երկրների միջեւ համագործակցության լայն համալիր: Կքննարկվեն ղարաբաղյան հակամարտության կարգավորման հեռանկարները»,- նշել է Զախարովան:
Նրա խոսքով՝ մինչ այդ, նեյեմբերի 20-ին Սերգեյ Լավրովը պաշտոնական այցով կայցելի Ադրբեջան: Բանակցություններ են նախատեսված Ադրբեջանի ԱԳ նախարարի հետ, որոնց ընթացքում կկատարվի կարծիքների փոխանակում. «Մենք քանիցս ասել ենք, որ Ադրբեջանը կովկասյան տարածաշրջանում մեր կարեւոր ռազմավարական գործընկերն է: Այս տարի մենք նշում ենք մեր երկրների միջեւ դիվանագիտական հարաբերությունների հաստատման 25-ամյակը»:
Զախարովան նշել է, որ Ռուսաստանը ԵԱՀԿ Մինսկի խմբի մյուս համանախագահների հետ շարունակում է նպաստել ղարաբաղյան հարցի կարգավորմանը: