Վրաստանը, Թուրքմենստանը, Ադրբեջանը, Աֆղանստանը եւ Թուրքիան պայմանավորվել են «Լազուրիթային ճանապարհ» նոր տարանցիկ միջանցքի ստեղծման մասին, որը ենթադրում է Աֆղանստանից Հարավային Կովկասի միջոցով դեպի Եվրոպա բեռների տեղափոխում: Այս մասին հաղորդում է «Նովոստի-Գրուզիան»՝ Վրաստանի ԱԳՆ-ին վկայակոչելով:
Աշխաբադում՝ Աֆղանստանի տնտեսական զարգացման յոթերորդ միջազգային խորհրդաժողովում, այսօր ստորագրվեց համապատասխան համաձայնագիր: Վրաստանից այդ փաստաթուղթը ստորագրել է փոխվարչապետ, արտաքին գործերի նախարար Միխայիլ Ջանելիձեն:
Նախագծի հեղինակները ակնկալում են, որ «Լազուրիթային միջանցքը» կլինի նոր «Մետաքսի ճանապարհի» շարունակությունը, որը Հարավային եւ Կենտրոնական Ասիայի երկրները կապում է Եվրոպայի հետ:
«Այսօր մենք կարեւոր բազմակողմ համաձայնագիր ենք ստորագրել: Աֆղանստանը, Թուրքմենստանը, Ադրբեջանը, Վրաստանը եւ Թուրքիան նոր տարանցիկ միջանցքի հիմքն են դրել: Սա նշանակում է, որ այս միջանցքով ավելի շատ բեռնափոխադրումներ են լինելու եւ մեր երկրների, Վրաստանի եւ տարածաշրջանի համար նոր հնարավորություններ են ստեղծվելու: Սա կարեւոր քայլ է մեր քաղաքականության ուղղությամբ, որպեսզի Վրաստանը տարածաշրջանի տարանցիկ նախագծերի ակտիվ մասնակիցը դառնա», - ասել է Ջանելիձեն:
