ՌԴ ԱԳ նախարար Սերգեյ Լավրովի Երեւան առաջիկա այցը նվիրված է 2 երկրների դիվանագիտական հարաբերությունների հաստատման 25-ամյակին: Նոյեմբերի 17-ին կայացած մամուլի ասուլիսի ժամանակ այս մասին ասաց ԱԳ նախարար Էդվարդ Նալբանդյանը:
Նրա խոսքով՝ ՌԴ ԱԳ նախարարի պաշտոնական այցը տեղի կունենա նոյեմբերի 20-21-ին: Այցի շրջանակում Ազգային պատկերասրահում տեղի կունենա կարեւոր ցուցահանդեսի բացում, մի շարք այլ մշակութային միջոցառումներ: Նախատեսված են հանդիպումներ Հայաստանի նախագահի եւ ԱԳ նախարարի հետ:
Օրակարգն ընդարձակ է, ընդգրկում է երկկողմանի հարաբերությունների լայն շրջանակ, 2 երկրների նախագահների ձեռք բերած համաձայնությունների իրականացում: Հարաբերությունները բազմաշերտ խորն են, եւ մենք ջանքեր չենք խնայում էլ ավելի ամրապնդման ու զարգացման համար, նշեց նախարարը: Նրա խոսքով՝ բնականաբար, հանդիպումների ընթացքում, հաշվի առնելով, որ Ռուսաստանը համանախագահ երկիր է եւ կարեւոր նշանակություն ունի ղարաբաղյան հակամարտության կարգավորման գործընթացում, այս հարցը եւս կքննարկվի: Ինչ վերաբերում է նոր առաջարկների հնարավորությանը, ապա նախարարը նշեց, որ դժվար է ինչ-որ նոր բան մտածել, քանի որ անցած տարիներին շատ բան է քննարկվել: Սակայն հիմքը նախկինն է՝ եթե Ադրբեջանն ականջալուր լինի միջազգային հանրության կոչերին, ապա բանակցություների առաջմղման նոր հնարավորությունններ կբացվեն:
