Ղարաբաղյան հարցն այն հարցն է, որտեղ ՌԴ-ն եւ մյուս համանախագահողները ունեն նույն դիրքորոշումները։ Այդ մասին այսօր՝ նոյեմբերի 21-ին ՀՀԿ ԳՄ նիստից հետո լրագրողների հետ զրույցում ասել է ԱԺ փոխնախագահ Էդուարդ Շարմազանովը։
Նրա խոսքով, ԳՄ նիստում քննարկել են հայ-ռուսական հարաբերությունները, շեշտել, որ դրանք վստահելի զարգանում են բոլոր ուղղություններով։ «Այդ իմաստով, դրանք կարելի է բնութագրել իրապես դաշնակցային հարաբերություններ։ Քննարկել ենք ՌԴ ԱԳ նախարար Լավրովի այցը։ Մենք դրական ենք գնահատում այցը, քանի որ դա կապված է դիվանագիտական հարաբերությունների 25-ամյակի հետ»,- ասել է Շարմազանովը։
Նա նաեւ նշել է, թե Էդվարդ Նալբանդյանը հստակ մեսիջ է տվել, առաջընթացի համար պետք է անհապաղ իրականացնեն պայմանավորվածությունները։ «Սա գալիս է ապացուցելու, որ հայկական կողմը չի փոխել իր դիրքորոշումները։ Որեւէ սկզբունք չի կարող մյուս սկզբունքի նկատմամբ ունենալ առաջնայնություն։ Լավրովի շուրթերից այս խոսքը հստակ ուղերձ էր Ադրբեջանին»,- ասել է Շարմազանովը։